Милринон (Milrinone)

Қолдану көрсеткіштері

Милринон стандартты демеуші емге төзімді декомпенсация сатысындағы созылмалы жүрек жеткіліксіздігін қысқа мерзімді емдеу үшін, сондай-ақ кардиохирургиялық операциялардан кейін жүректің аз лықсыту күйін қоса, жедел жүрек жеткіліксіздігін емдеу үшін көрсетілген.
Балаларда Милринон стандартты демеуші емге (жүрек гликозидтері, диуретиктер, вазодилататорлар және/немесе ангиотензин өзгертуші фермент (АӨФ) тежегіштері) төзімді декомпенсация сатысындағы созылмалы жүрек жеткіліксіздігін қысқа мерзімді емдеу үшін (35 сағатқа дейін), сондай-ақ кардиохирургиялық операциялардан кейін жүректің аз лықсыту күйін қоса, жедел жүрек жеткіліксіздігін қысқа мерзімді емдеу үшін көрсетілген.

Клинические протоколы:

Қарсы көрсеткіштері

әсер етуші затқа немесе қосымша заттардың кез келгеніне аса жоғары сезімталдық
- ауыр гиповолемия

Қауіпсіздік шаралары

Миокард инфарктісінің жедел фазасында милринон сияқты инотропты препараттарды қолдану миокардтың оттегі тұтынуының қолайсыз артуына әкелуі мүмкін. Осы жағдайда препаратты енгізу қауіпсіздігі мен тиімділігінің анықталуына дейін Милринон жедел миокард инфарктісі кезінде қолдануға ұсынылмайды.
Милринонмен емдеу кезеңінде артериялық қысымға, жүректің жиырылу жиілігіне, клиникалық жағдайға, электрокардиограмма көрсеткіштеріне, су-электролит теңгеріміне және бүйрек функциясына (мысалы, сарысу креатинині) мониторинг өткізу қажет.
Айқын қолқа стенозы немесе өкпе артериясы клапанының стенозы немесе гипертрофиялық субаорталық стенозы бар пациенттерде Милринонды обструкцияны жою үшін хирургиялық әдістер орнына қолдануға болмайды. Ондай жағдайларда Милринон сияқты инотропты препарат/вазодилятатор өкпе қан ағымының обструкциясын күшейтуі мүмкін.
Милринон алған жоғары қауіп бар пациенттер қауымында суправентрикулярлық және қарыншалық аритмиялар дамуы болды. Кейбір пациенттерде, тұрақсыз қарыншалық тахикардияны қоса, қарыншалық эктопия күшеюі байқалды, бұл пациенттің қауіпсіздігіне немесе емдеу нәтижесіне ықпал етпеді.
Милринон атриовентрикулярлық түйін өткізгіштігінің мардымсыз жоғарылауын тудыратындықтан, бақыланбайтын жүрекшелер жыпылықтауы/фибрилляциясы бар пациенттерде қарыншалық жауап жиілігінің арту ықтималдығы бар. Сол себепті, атриовентрикулярлық түйіннің өткізгіштік уақытын арттыру үшін Милринонмен емдеуді бастар алдында дигитализация немесе басқа препараттарды қолдану мүмкіндігін қарастыру керек, аритмия дамығанда емдеуді тоқтату керек.
Жүрек жеткіліксіздігінде аритмияның даму ықтималдығы басқа дәрілік препараттарды немесе олардың біріктірілімдерін қолдану кезінде артуы мүмкін. Милринон алатын пациенттер инфузия кезінде мұқият қадағалауда болуы тиіс, ал аритмия дамығанда препаратты енгізуді тоқтату керек.
Милринон тамыр кеңейткіш әсеріне байланысты артериялық гипотензия дамуын туындатуы мүмкін; осылайша, Милринонмен ем көрсетілген гипотония бар пациенттер емдеу басталуына дейін мұқият бақылауда болуы тиіс. Артериялық қысымның елеулі төмендеуі бар пациенттерде инфузия жылдамдығын азайту немесе препаратты енгізуді тоқтату керек.
Осының алдында диуретиктер қолданудың артериялық қысымның елеулі төмендеуіне әкелуіне күмән болса, Милринонды енгізу кезінде артериялық қысымды, жүректің жиырылу жиілігін және клиникалық симптоматиканы тұрақты бақылау қажет.
Диуретиктермен ем кезінде жүрек лықсыту көрсеткіштері жақсарса, диуретик дозасын төмендету ұсынылады. Диуретиктермен күшейтілген ем нәтижесінде калий мөлшерінің төмендеуі диуретик дозасын төмендетуді талап етуі мүмкін. Диуретиктердің жоғары дозаларын қолданумен байланысты туындаған гипокалиемия дигиталис препараттарын қабылдайтын пациенттерде аритмия дамуын туындатуы мүмкін. Осылайша, гипокалиемияны Милринонды қолдануға дейін немесе қолдану кезінде калий препараттарын қосумен түзету керек.
Милринон инфузиясын енгізген жерде реакцияның пайда болу жағдайлары хабарланды. Осыған байланысты, ықтимал экстравазацияны болдырмау үшін инфузияның дұрыс жасалуын мұқият қадағалау керек.
Гемоглобин төмендеуі, оның ішінде анемия дамуы жүрек жеткіліксіздігі аясында жиі болады. Тромбоциттер немесе гемоглобин мөлшері төмендеген пациенттерде тромбоцитопения немесе анемия даму қаупіне байланысты осы зертханалық көрсеткіштерге мұқият мониторинг талап етіледі.
Милринонды инфузия түрінде 48 сағаттан астам кезең ішінде қолдану зерттелмеген.

Дәрілік заттармен өзара әрекеттесуі

Преципитацияны болдырмау үшін Милринонды енгізген бір ғана тамшылатқышпен фуросемид немесе буметанидті енгізуге болмайды.
Милринонды натрий бикарбонаты ерітіндісімен қолдануға болмайды.
Кальций өзекшелерінің блокаторларымен теориялық ықтималды өзара әрекеттесуі болса да, клиникалық мәнді өзара әрекеттесу дәлелдері жоқ.
Милринон гликозидтердің уыттылық белгілерін тудырмай, жүрек гликозидтерін қабылдайтын пациенттерге инотропты әсерін көрсетеді.
Басқа дәрілік, оның ішінде үйлесімді препараттарды Милринонмен бір мезгілде енгізуге болмайды.
Милринонмен емдеу кезеңінде су-электролит теңгерімін, сондай-ақ қан сарысуында креатинин деңгейін мұқият бақылап отыру керек. Жүрек лықсытуының және, сол себепті, диурез артуы диурездік дәрі дозасын төмендетуді талап етуі мүмкін. Диурездің артуына байланысты калий жойылуы дигитализацияланған пациенттерде аритмия дамуына ықпал етуі мүмкін. Осылайша, Милринонды қолдануға дейін немесе қолдану кезінде гипокалиемияны калий препараттарын қосумен түзету керек.

Бүйрек жеткіліксіздігі

Бүйрек жеткіліксіздігі бар пациенттерде қолданған кезде дозаны түзету қажет.

Ауыр бүйрек жеткіліксіздігі бар, бірақ жүрек жеткіліксіздігі жоқ пациенттерден алынған деректер бүйрек жеткіліксіздігінің болуы милринонның жартылай шығарылуының соңғы кезеңін едәуір ұзартатынын көрсетті. Бүйрек жеткіліксіздігінің клиникалық белгілері бар пациенттерде жүктемелік дозаны өзгерту қажет емес, алайда демеуші инфузияның жылдамдығын креатинин клиренсіне байланысты түзету ұсынылады.
Креатинин клиренсі 5 мл/мин/1,73 м² болғанда Милринонның ұсынылатын дозасы 0,20 мкг/кг/мин, демеуші инфузияның жылдамдығы – 0,06 мл/кг/сағ.
Креатинин клиренсі 10 мл/мин/1,73 м² болғанда Милринонның ұсынылатын дозасы 0,23 мкг/кг/мин, демеуші инфузияның жылдамдығы – 0,07 мл/кг/сағ.
Креатинин клиренсі 20 мл/мин/1,73 м² болғанда Милринонның ұсынылатын дозасы 0,28 мкг/кг/мин, демеуші инфузияның жылдамдығы – 0,08 мл/кг/сағ.
Креатинин клиренсі 30 мл/мин/1,73 м² болғанда Милринонның ұсынылатын дозасы 0,33 мкг/кг/мин, демеуші инфузияның жылдамдығы – 0,10 мл/кг/сағ.
Креатинин клиренсі 40 мл/мин/1,73 м² болғанда Милринонның ұсынылатын дозасы 0,38 мкг/кг/мин, демеуші инфузияның жылдамдығы – 0,11 мл/кг/сағ.
Креатинин клиренсі 50 мл/мин/1,73 м² болғанда Милринонның ұсынылатын дозасы 0,43 мкг/кг/мин, демеуші инфузияның жылдамдығы – 0,13 мл/кг/сағ.
Инфузия жылдамдығын пациенттің гемодинамикалық жауабына сәйкес түзету керек.

Бауыр жеткіліксіздігі

Деректер жоқ.

Жүктілік

Жүктілік кезеңінде Милринонды қолдану жөнінде клиникалық деректер жоқ.
Жануарларда буаздық/эмбриондық/құрсақішілік даму/тууға немесе туудан кейінгі дамуға тікелей немесе жанама қолайсыз әсері анықталмады.
Препаратты жүктілік кезінде ықтималды пайдасы шарана үшін зор қауіптен артық болған жағдайда ғана қолдану керек.

Емізу

Милринонның емшек сүтімен бөлінуі туралы ақпарат жеткіліксіз.
Бала емізуді тоқтату немесе Милринонмен емді тоқтату шешімін сәби үшін емшекпен қоректенудің артықшылығы мен ана үшін емнің пайдасын ескере отырып, қабылдау керек.

Жағымсыз әсерлері

Жиі
- әдетте, ауырлығы жеңілден орташа дәрежеге дейінгі бас ауырулар
- қарыншалардың эктопиялық белсенділігі, тұрақсыз немесе ұзаққа созылатын қарыншалық тахикардия, қарыншаүстілік аритмия, гипотония
Жиі емес
- гипокалиемия
- тремор
- қарыншалар фибрилляциясы, стенокардия/кеуденің ауыруы
- бауырдың функционалдық сынамаларының қалып шегінен ауытқулары
- тромбоцитопения*
Өте сирек
- анафилаксиялық шок
- Torsades de pointes (TdP) (полиморфты қарыншалық немесе қарыншалар фибрилляциясына ұласатын тахикардия). Аритмиялар жиілігі милринон дозасымен немесе оның плазмадағы мөлшерімен байланысты емес. Аталған аритмиялардың өмірге қауіпті болуы сирек. Егер аритмия пайда болса, олар бұрыннан болған аритмия, метаболизмдік бұзылулар (мысалы, гипокалиемия), қанда дигоксин мөлшерінің өзгеруі және катетер енгізу сияқты белгілі бір негізгі факторлармен жиі байланысты. Клиникалық деректер милринон енгізумен байланысты аритмияның балаларда ересектердегіден сирек кездесетінін айғақтайды.
- бронх түйілуі
- бөртпе сияқты тері реакциялары
Белгісіз (қолда бар деректер негізінде бағалау мүмкін емес)
- эритроциттер саны мен гемоглобин концентрациясының төмендеуі
- қатарлас гипотензияға қатысты салдарлы бүйрек жеткіліксіздігі
- инфузия орнындағы реакциялар
Балалар
Жүйке жүйесі тарапынан бұзылулар
Белгісіз: қарыншаішілік қан құйылу
Туа біткен, отбасылық және генетикалық бұзылулар
Белгісіз: ашық артериялық түтік**
*Сәбилер мен балаларда тромбоцитопения қаупі инфузия ұзақтығының арттырылумен едәуір артады. Клиникалық деректер милринонмен байланысты тромбоцитопенияның балаларда ересектердегіден жиірек кездесетінін айғақтайды.
** Ашық артериялық түтіктің қатер шегіндегі зардаптары, әдеби деректерге сәйкес, өкпеде қан айналымы күшеюінің жүйелі өкпе ісінуімен, қан құйылумен және жүйелі қарыншаішілік қан кетумен ағзалар перфузиясының төмендеуімен және өліммен аяқталуы мүмкін некроздық энтероколитпен бірігуіне байланысты.
Балаларда препаратты қолдану қауіпсіздігі бойынша ұзақ мерзімді деректер жоқ.

Көрсеткіштері, қолдану тәсілі мен дозалары

Ересектер: милринонмен емдеуді 10 минут ішінде 50 мкг/кг жүктемелік дозаны енгізуден бастайды, содан кейін, әдетте, гемодинамикалық көрсеткіштер мен пациенттің клиникалық жауабына байланысты 0,375-тен 0,75 мкг/кг/мин дейінгі дозада үздіксіз демеуші инфузияға көшеді. Жалпы тәуліктік доза 1,13 мг/кг-ден аспауы тиіс.
Құрамында 200 мкг/мл Милринон бар инфузиялық ерітіндіні дайындау үшін 10 мл препаратқа 40 мл еріткіш қосады (немесе 100 мл препаратқа 400 мл еріткіш қосады). Еріткіш ретінде 0,45 % натрий хлориді ерітіндісі, 0,9 % натрий хлориді ерітіндісі (физиологиялық ерітінді) немесе 5 % глюкоза ерітіндісі пайдаланылады.
Демеуші дозаны енгізу кезінде инфузия жылдамдығы:
0,375 мкг/кг/мин дозада – 0,11 мл/кг/сағ;
0,400 мкг/кг/мин дозада – 0,12 мл/кг/сағ;
0,500 мкг/кг/мин дозада – 0,15 мл/кг/сағ;
0,600 мкг/кг/мин дозада – 0,18 мл/кг/сағ;
0,700 мкг/кг/мин дозада – 0,21 мл/кг/сағ;
0,750 мкг/кг/мин дозада – 0,22 мл/кг/сағ.
Пациенттің сұйықтыққа деген қажеттілігіне байланысты әртүрлі концентрациядағы ерітінділер қолданылуы мүмкін. Емдеу ұзақтығы пациенттің клиникалық жауабына қарай айқындалады. Декомпенсацияланған жүрек жеткіліксіздігі кезінде препарат 5 тәулікке дейін инфузия түрінде енгізілген, алайда емдеудің әдеттегі ұзақтығы 48–72 сағатты құрайды. Кардиохирургиялық операциялардан кейінгі жедел жағдайларда 12 сағаттан астам емдеу қажеттілігі екіталай.

Балаларда қолданылуы

• Венаішілік екпінді доза: 30-60 минут ішінде 50-75 мкг/кг.
• Венаішілік үздіксіз инфузия: гемодинамикалық реакцияға және жағымсыз реакциялардың басталу болжамына байланысты 35 сағатқа дейінгі кезең ішінде 0,25-тен 0,75 мкг/кг/мин дейін құрайды.
Туа біткен жүрек ақауы себебімен түзету операциясынан кейін сәбилер мен 6 жасқа дейінгі балаларда аз жүрек лықсыту синдромын зерттеу кезінде 35 сағат ішіндегі 0,75 мкг/кг/мин инфузияға ұласатын 60 минут ішінде 75 мкг/кг екпінді дозаның аз жүрек лықсытуы синдромының даму қаупін едәуір төмендетуі мәлімделді.

Бөлімді таңдау

C01CE02 Милринон (Milrinone)