D11AX01 Миноксидил (Minoxidil)

Қолдану көрсеткіштері

Ересек ерлер мен әйелдердегі андрогенетикалық алопецияны емдеу.
Препарат андрогенетикалық алопеция кезінде шаштың өсуін ынталандыру және шаштың түсу үдерісін тұрақтандыру үшін қолданылады.

Клинические протоколы:

Артериальная гипертензия у детей и подростков
Алопеция

Қарсы көрсеткіштері

Миноксидилге немесе препараттың құрамындағы кез келген қосалқы заттарға, оның ішінде этанолға және пропиленгликольге жоғары сезімталдық; бас терісінің псориазды, күнге күюді, қызаруды, қабынуды, инфекциялануды және ауырсынуды қоса алғанда, аурулары мен зақымданулары; препаратты бастың шашты бөлігінің қырылған терісіне қолдану; окклюзиялық таңғыштармен немесе жергілікті қолдануға арналған басқа да дәрілік препараттармен бір мезгілде қолдану; артериялық гипертензия; жүктілік және бала емізу кезеңі; 18 жасқа дейінгі балалар мен жасөспірімдер.

Қауіпсіздік шаралары

Препаратты қолданар алдында бас терісінің қалыпты және сау күйде екеніне көз жеткізу керек.
Бас терісінде қызару, қабыну, инфекция, тітіркену немесе ауырсыну болған жағдайда препаратты қолдануға болмайды. Препаратты бас терісіне жаққаннан кейін қолды мұқият жуу керек, әсіресе әйелдер қолды мұқият жууы тиіс, өйткені дененің басқа бөліктерінде қажетсіз түктердің өсу қаупі бар. Препараттың көзге және шырышты қабықтарға түсуіне жол бермеу керек. Препарат көзге кездейсоқ түскен жағдайда көзді көп мөлшердегі сумен шаю және қажет болған жағдайда дәрігерге қаралу керек. Өңделген тері аумақтарына тікелей күн сәулесінің және ультракүлгін сәулеленудің әсер етуіне жол бермеу керек. Қажет болған жағдайда тиісті қорғаныс құралдарын пайдалану керек. Препаратты бас терісінің зақымданған терісіне қолдануға болмайды.

Дәрілік заттармен өзара әрекеттесуі

Миноксидилді жергілікті қолдануға арналған басқа да дәрілік препараттармен бір мезгілде қолдану ұсынылмайды, өйткені терінің мүйізді қабатының бөгеттік функциясына әсер ететін дәрілік препараттар миноксидилдің тері арқылы сіңуін арттыруы мүмкін. Третиноинмен және антралинмен (дитранолмен) бір мезгілде қолданғанда мүйізді қабаттың өткізгіштігінің жоғарылауына байланысты миноксидилдің тері арқылы сіңуі артуы мүмкін. Бетаметазон дипропионатымен бір мезгілде қолданғанда тіндердегі миноксидилдің жергілікті концентрациясы жоғарылап, оның жүйелік сіңуі төмендеуі мүмкін. Миноксидилді шеткері вазодилататорлармен және гипертензияға қарсы дәрілік препараттармен бір мезгілде қолданғанда ортостаздық гипотензияның даму қаупін жоққа шығаруға болмайды.

Бүйрек жеткіліксіздігі

Бүйрек жеткіліксіздігі бар пациенттерде қолдануға шектеу қойылмаған

Бауыр жеткіліксіздігі

Бауыр жеткіліксіздігі бар пациенттерде қолдануға шектеу қойылмаған

Жүктілік

Препарат жүктілік кезінде қолдануға қарсы көрсетілген.

Емізу

Препарат лактация кезеңінде қолдануға қарсы көрсетілген.

Жағымсыз әсерлері

Жиі: жергілікті тітіркену, оның ішінде терінің қабыршақтануы, қызаруы, дерматит, терінің құрғауы, күйдіру сезімі және қышыну; гипертрихоз (денеде қажетсіз түктердің өсуі, оның ішінде әйелдердің бетінде түктердің өсуі).
Жиі емес: жоғары сезімталдық реакциялары, оның ішінде аллергиялық реакциялар, ринит, тері бөртпесі, жайылған эритема, беттің ісінуі; бас айналуы, парестезиялар, бас ауыруы, әлсіздік, неврит, ісінулер, дәм сезудің бұзылуы, сыртқы отит; көрудің бұзылуы, көздің тітіркенуі.
Жиілігі белгісіз: жүрек соғуының жиілеуі, тахикардия, артериялық қысымның төмендеуі, ортостаздық гипотензия, кеуденің ауыруы, сұйықтық пен натрийдің іркілуі, шеткері ісінулер, дене салмағының кенеттен жоғарылауы; емдеудің басында шаштың түсуінің күшеюі; шаштың түсінің немесе құрылымының өзгеруі; жанаспалы дерматит.
Маңызды! Мұнда жағымсыз реакцияларға қысқаша шолу берілген. Толық ақпарат алу үшін дәрілік препаратты медициналық қолдану жөніндегі нұсқаулыққа жүгіну керек.

Көрсеткіштері, қолдану тәсілі мен дозалары

Препарат тек сыртқа қолдануға арналған. Ересектер. Препараттың 1 мл мөлшерін бастың шашты бөлігінің құрғақ терісіне тәулігіне 2 рет, таңертең және кешке, зақымданған аумақтың ортасынан бастап жағады және қолданылатын аумаққа біркелкі таратады. 1 мл доза бүріккішті 10 рет басуға сәйкес келеді. Ұсынылатын тәуліктік доза 2 мл құрайды және зақымданған аумақтың көлеміне байланысты емес. Ұсынылатын дозадан асыруға немесе препаратты қолдану жиілігін арттыруға болмайды. Препаратты жаққаннан кейін қолды мұқият жуу қажет. Препаратты дененің басқа бөліктеріне жағуға болмайды. Пациенттердің ерекше топтары. Егде жастағы пациенттер 65 жастан асқан пациенттерде миноксидилді қолданудың қауіпсіздігі мен тиімділігі анықталмаған. Пациенттердің осы санатында препаратты қолдану ұсынылмайды. Енгізу әдісі мен жолы
Сыртқа, тек бастың шашты бөлігінің терісіне қолданылады. Препаратты жағар алдында шаш пен бастың шашты бөлігінің терісі құрғақ болуы тиіс. Емдеу ұзақтығы. Емдеу ұзақтығы жеке анықталады. Емдік әсерге қол жеткізу үшін препаратты бірнеше ай бойы үздіксіз қолдану қажет болуы мүмкін. Қол жеткізілген әсерді сақтау үшін препаратты тұрақты қолдануды жалғастыру қажет. Емдеуді тоқтатқаннан кейін шаштың түсуі қайта басталып, қол жеткізілген әсердің біртіндеп жоғалуы 3–4 ай ішінде байқалуы мүмкін. Егер препаратты 12 ай бойы тұрақты қолданғаннан кейін жақсару байқалмаса, емдеуді тоқтату мәселесін қарастыру керек.

Балаларда қолданылуы

18 жасқа дейінгі балалар мен жасөспірімдерде миноксидилді қолдану ұсынылмайды, өйткені пациенттердің осы жас тобында препаратты қолданудың қауіпсіздігі мен тиімділігі анықталмаған.